સુરતના વાતાવરણમાં સવારમાં શહેર અને જિલ્લામાં 100 ફૂટ દૂર કઈ ન દેખાય એવું ગાઢ ધુમ્મસનું સામ્રાજ્ય,વિઝિબિલિટી ઓછી થતાં વાહનચાલકોની મુશ્કેલી વધી

Surat News: સુરતમાં હાલ બેવડી ઋતુનો અનુભવ થઈ રહ્યો છે. ત્યારે છેલ્લા એક સપ્તાહની અંદર ઠંડી અને ગરમીના અનુભવથી સુરતીઓ પણ આશ્ચર્યમાં મુકાયા છે. બપોરના સમયે ગરમીનો અનુભવ થાય છે, તો મોડી રાતે અને વહેલી સવારે ઠંડીનો ચમકારો દેખાય છે.ત્યારે આજે સવારના સમયે વાતાવરણમાં ધુમ્મસનું સામ્રાજ્ય જોવા મળ્યું હતું. વહેલી સવારે ગાઢ ધુમ્મસ સર્જાતા વિઝિબિલિટી ઘટી ગઈ હતી. જેથી વાહનચાલકોને વાહનો ચલાવવામાં ભારે મુશ્કેલીનો સામનો કરવો પડ્યો હતો.

આજે વહેલી સવારે સુરત શહેર અને જિલ્લાની અંદર વાતાવરણમાં સ્પષ્ટ રીતે પલટો દેખાયો હતો. માવઠા સમયે જે પ્રકારે વાતાવરણમાં પલટો આવે છે, તેવો માહોલ સુરતમાં જોવા મળી રહ્યો છે. વહેલી સવારે ધુમ્મસ ભર્યા વાતાવરણ સાથે ઠંડીનો ચમકારો વર્તાયો હતો. દરરોજ સવારે જ્યાં તડકો દેખાતો હતો, ત્યાં આજે ધુમ્મસના કારણે વિઝિબિલિટી પણ ઓછી જોવા મળી હતી. વાહનચાલકોએ પણ હાઇવે પર વાહનની લાઈટનો સહારો લેવાની ફરજ પડી હતી. એકાએક ધુમ્મસ છવાઈ જતા વાતાવરણમાં થોડી ઠંડક રહી હતી, પરંતુ ખેડૂતોની ચિંતા વધી હતી.

સુરતના વાતાવરણમાં સતત પલટો આવી રહ્યો છે. બપોરના સમયે ગરમીનો પારો ચડતા અસત્ય ગરમીથી સુરતીઓ ત્રસ્ત દેખાય છે. તો સાંજના સમયે અને રાત્રિના સમયે પણ બફારો અનુભવી રહ્યા છે. આવી સ્થિતિમાં એકાએક ધુમ્મસ જેવું વાતાવરણ ઊભું થતા ખેડૂતોમાં માવઠાને લઈ ચિંતા વધી છે. વાતાવરણમાં થતા સતત બદલાવને કારણે લોકો બેચેની અનુભવી રહ્યા છે અને સ્વાસ્થ્યને લઈને પણ અનેક તકલીફો સામે આવી રહી છે.

વધુ ધુમ્મસના કારણે વાહનોની સ્પીડ પણ ઘટી ગઈ હતી. સવારે ઠંડી તો બપોરે તડકાનો અનુભવ લોકો કરી રહ્યા છે.બેવડી ઋતુના કારણે રોગચાળો વધે તેવી પણ શક્યતા સેવાઈ રહી છે. હાલ શરદી-ઉધરસ અને તાવના કિસ્સામાં પણ ઉત્તરોત્તર વધારો થઈ રહ્યો છે. ધુમ્મસના કારણે ખેડૂતોમાં પણ ચિંતાનું મોજૂ ફરી વળ્યું છે.