રાજકોટના કેકેવી ચોક નજીક ભાજપના ઉમેદવાર પરષોત્તમ રૂપાલાનાં પોસ્ટર પર શાહી ફેંકાઈ,અજાણ્યા શખ્સની શોધખોળ

Rajkot News: રાજકોટ લોકસભા બેઠકના ભાજપના ઉમેદવાર પરષોત્તમ રુપાલા (Parashottam Rupala)નો ક્ષત્રિય સમાજ(Kshatriya Samaj) દ્વારા વિરોધ રાજ્યભરમાં કરવામાં આવી રહ્યો છે. તો બીજી તરફ રુપાલા દ્વારા ડોર ટૂ ડોર પ્રચાર શરૂ કરવામાં આવ્યો છે. આજે રુપાલાએ કુવાડવા રોડ વિસ્તારમાં પ્રચાર શરૂ કર્યો છે ત્યારે કે.કે.વી અન્ડર બ્રિજ પાસે તેમના લગાવવામાં આવેલા પોસ્ટર પર કાળી શાહી લગાવવામાં આવી છે. જેને લઇને રાજકોટનું રાજકારણ ગરમાયુ છે.

પ્રાપ્ત વિગત મુજબ, રાજકોટનાં કેકેવી ચોકથી ઇન્દિરા સર્કલ તરફ જતા રસ્તે ‘રાજકોટ છે મક્કમ રૂપાલા સાથે અડીખમ’ લખેલા પોસ્ટર લગાવવામાં આવ્યા છે. જોકે, આ પૈકીના એક પોસ્ટરમાં અજાણ્યા શખ્સ કે શખ્સો દ્વારા પુરુષોત્તમ રૂપાલાનાં ફોટા ઉપર શાહી ફેંકવામાં આવી છે. ત્યારે ક્ષત્રિય સમાજ દ્વારા આ કામ કરવામાં આવ્યું છે કે, પછી કોઈ ટીખળખોરો દ્વારા આંદોલનને વધુ ભડકાવવા માટે આ કૃત્ય કરવામાં આવ્યું છે, તે તપાસનો વિષય છે. આ અંગેની જાણ થતાં પોલીસ દ્વારા આરોપીને ઝડપી પાડવા તપાસ હાથ ધરવામાં આવી છે.

મહત્વનું છેકે જ્યાં કોઇ અજાણી વ્યક્તિ દ્વારા આ પોસ્ટર પર કાળી શાહી લગાવવામાં આવી છે. ત્યાંથી થોડેક દૂર જ ભાજપનું મધ્યસ્થ ચૂંટણી કાર્યાલય આવેલું છે. ક્ષત્રિય સમાજ દ્વારા કરવામાં આવેલા વિરોધની વચ્ચે આ પ્રકારે પોસ્ટર પર કાળી શાહી લગાવવામાં આવતા રાજકોટના ચૂંટણી માહોલમાં ગરમાવો આવી ગયો છે. શાહી કોણે લગાવી તેની તપાસ કરવામાં આવી રહી છે.