ગાંધીનગર/ માણાવદરના કોંગ્રેસના ધારાસભ્ય અરવિંદ લાડાણીએ આપ્યું રાજીનામું,કહ્યું-ટૂંક સમયમાં ભાજપમાં જોડાઈશ

અરવિંદ લાડાણીએ રાજીનામું આપ્યું

જાણકારી મુજબ રાજુલામાં ભાજપ પ્રદેશ પ્રમુખ સી.આર. પાટીલ સાથે ગુપ્ત બેઠક મળી હતી. તેમજ છેલ્લા 3 દિવસથી ધારાસભ્યનો ફોન બંધ આવતો હતો. ત્યારે આજે સવારથી તેમના રાજીનામાની અટકળો ચાલી રહી હતી ત્યારે આજે તેઓ રાજીનામુ આપવા પહોંચતા આ અટકળો પર પૂર્ણ વિરામ મુકાયું હતું.  અરવિંદ લાડાણી અર્જુન મોઢવાડિયાના નજીકના માનવામાં આવે છે. જેથી અર્જુન મોઢવાડિયા ભાજપમાં જોડાયા બાદ લાડાણીને ભાજપમાં લઈ જઈ રહ્યા હોય તેવું ચર્ચાઈ રહ્યું છે.

સૌરાષ્ટ્રમાં કોગ્રેસમા માત્ર વિમલ ચુડાસમા ધારાસભ્ય

ધારાસભ્ય અરવિંદ લાડાણી (Arvind Ladani) રાજીનામા બાદ હવે સૌરાષ્ટ્રમાં કોગ્રેસમા માત્ર વિમલ ચુડાસમા ધારાસભ્ય રહ્યા છે. આ સાથે ગુજરાતમાં કોંગ્રેસનું સંખ્યાબળ ઘટીને 13 થઈ ગયું છે.

કોણ છે અરવિંદ લાડાણી ?

1989માં તેઓ સૌપ્રથમવાર કોડવાવ ગામના સરપંચ બન્યા હતા. ત્યાર બાદ 1995થી કોડવાવ ગામની સહકારી મંડળી અને કેળવણી મંડળના પ્રમુખ રહ્યા. અરવિંદ લાડાણી 2019ની પેટાચૂંટણીમાં ભાજપના તત્કાલીન મંત્રી જવાહર ચાવડા સામે પહેલીવાર ધારાસભાની ચૂંટણી લડ્યા હતા. જેમાં તેઓ જવાહર ચાવડા સામે 9000 મતથી હાર્યા હતા. જોકે કોંગ્રેસે ફરી એકવાર 2022માં તેમના પર વિશ્વાસ વ્યક્ત કરી ટિકિટ આપી હતી ત્યારે તેમને પરિવારનું કોઈપણ જાતનું રાજકીય કનેકશન ન હોવા છતાં તેમણે પેથલજી ચાવડાનો રાજકીય વારસો ધરાવતા ભાજપના જવાહર ચાવડાને હરાવ્યા હતા. અરવિંદ લાડાણી સાવ સાદા પેન્ટ-શર્ટમાં બાઇક પર ફરતા જોવા મળે છે તેમને કોમનમેનથી ઓળખવામા આવે છે.