સારોલી પોલીસ સ્ટેશનના પીઆઇ એસ.આર. વેકરીયાએ જણાવ્યું હતું કે, મેટ્રોના અધિકારી દ્વારા અમને આ ઘટના અંગે જાણ કરવામાં આવી હતી. અમે તમામ પોલીસ સ્ટાફ સાથે અહીં સારોલી રોડ ઉપર પહોંચી ગયા છે. સુરતથી કડોદરા તરફ જતો આખો રૂટ પુણા તરફથી ડાયવર્ટ કરી દેવામાં આવ્યો છે. મેટ્રોની કામગીરી દરમિયાન સ્પાનમાં કંઈક ટેકનિકલ ખામી હોય તેવી વાત હમણાં ચર્ચા પણ રહી છે. અમારે કામગીરી સમગ્ર રૂટને ડાયવર્ટ કરવાનો છે અને કોઈ પણ પ્રકારના વાહનચાલકોને મુશ્કેલીના થાય તેના માટે અમે તકેદારી રાખી રહ્યા છે.

ભાજપના શાસનમાં આ પ્રકારના ભ્રષ્ટાચાર સતત વધી રહ્યા છેઃ આપ

આ અંગે ઘટનાસ્થળે દોડી આવેલા આમ આદમી પાર્ટીના કોર્પોરેટર સેજલ માલવિયાએ મીડિયા સાથેની વાતચીતમાં જણાવ્યું કે મેટ્રોની કામગીરીને લઈને હંમેશા પ્રશ્નો ઊભા થઈ રહ્યા છે. કરોડો રૂપિયાના ખર્ચે તૈયાર થયેલો આ મેટ્રો પ્રોજેક્ટમાં ખૂબ મોટી ગંભીર ક્ષતિઓ સામે આવી છે. મેટ્રોનો જે આખો સ્પાન છે તે નમી ગયો છે અને ગમે ત્યારે તૂટી જાય તે પ્રકારની સ્થિતિ જોવા મળી રહી છે. ભાજપના શાસનમાં આ પ્રકારના ભ્રષ્ટાચાર સતત વધી રહ્યા છે અને તેના કારણે આવી ઘટનાઓ સામે આવી રહી છે.

તમામ સેગમેન્ટને જોડતા હાઇડ્રોલિક કેબલમાં ખામી સર્જાઈ છે કે કેમ તેની તપાસ થશે

મેટ્રો પ્રોજેક્ટના અધિકારી પાસે મળતી માહિતી મુજબ મેટ્રોના એલિવેટેડ વાઇડક સેગમેન્ટને ઉતારવામાં આવશે. સાથે સાથે લોન્ચરનો લોડ હટાવવામાં આવશે. ત્યાર પછી મેટ્રો વિભાગ દ્વારા તપાસ કરવામાં આવશે. હાઇડ્રોલિક કેબલ જે તમામ સેગમેન્ટને એક બીજા સાથે જોડે છે તેમાં કોઈ ખામી સર્જાઈ છે કે નહીં તે અંગે તપાસ કરવામાં આવશે. રિલાઇન થઈ ગયું છે કે ડિસ્પ્લેસ થઈ ગયું છે તે અંગેની તપાસ કરવામાં આવશે. હાઇડ્રોલિક પ્રેશરથી ક્રેક થઈ ઉપર આવ્યું છે તે અંગેની પણ તપાસ કરવામાં આવશે .

સુરત મેટ્રોનું વર્ષ 2027માં ઉદ્ઘાટન થવાનું છે ત્યારે એ પહેલા બ્રિજમાં મોટી ખામી સામે આવી છે. ભેસાણ થી સારોલી મેટ્રો પ્રોજેક્ટ માટે 18 કિમી એલિવેટેડ બ્રિજ બનાવવામાં આવી રહ્યો હતો. ઉલ્લેખનીય છે કે, ડિસેમ્બર 2021થી મેટ્રોની કામીગીરી શરૂ કરવામાં આવી હતી.