- મોટા વરાછામાં બેફામ કાર ચાલકે લીધો બેના ભોગ
- મોડી રાત્રે 7 થી વધુ લોકોને લીધા અડફેટે
- મોટા વરાછા વિસ્તારનો બનાવ
Surat accident: સુરતમાં અકસ્માતો સતત સર્જાતા રહે છે. જો કે, શુક્રવારે મોડીરાત્રીએ સર્જાયેલા અકસ્માતે શોકની કાલિમા સર્જી છે. ઓવર સ્પીડમાં દોડતી લક્ઝુરિયસ કારે રાત્રિના બે વાગ્યે રસ્તા પર હવા ખાવા બેઠેલા એક જ પરિવારના સંબંધીઓને અડફેટે લીધા હતાં. જેથી 29 વર્ષના માસાઅને 6 વર્ષના તેના ભત્રિજાનું મોત નીપજ્યું હતું. જ્યારે સગર્ભા સહિતના 4 વ્યક્તિને ઈજાઓ પહોંચતા સારવાર માટે હોસ્પિટલ ખસેડવામાં આવ્યાં છે.
રિંગરોડ પર મોટી દુર્ઘટના
સુરતમાં નવા બની રહેલા રિંગ રોડનું કામ હજુ શરૂ છે. થોડો ભાગ શરૂ થઈ ગયો છે. ત્યારે હવા ખાવાનું સ્થળ બની ગયું હોય તેમ આ રોડ પર લોકો રાત્રિના સમયે બેસવા આવતાં હોય છે. રાત્રિના સમયે હવા ખાવા આવેલા વાઘાણી-વાવડિયા પરિવારને ક્યાં ખબર હતી કે આ તેમના માટે કાળ સમાન સાબિત થશે. કારણ કે હોન્ડા સિટી કારે ચાર જેટલા ટુ-વ્હિલરને પણ ઉડાડતા એક બાઈક કારની નીચે આવી જતા તેને પણ ઢસડ્યું હતું.
મળતી માહિતી પ્રમાણે, મોડી રાત્રે બે વાગ્યા આસપાસ મોટા વરાછા રીંગરોડ વિસ્તારમાં દુખિયાના દરબાર પાસે ગમખ્વાર અકસ્માત સર્જાયો હતો. પૂરપાટ ઝડપે દોડી રહેલા કારના ચાલકે કાબુ ગુમાવતા ત્યાંથી પસાર થઈ રહેલા બાઈક ચાલકોને લીધા હતા. એક બાઈક પર યુવક અને એક બાળક પસાર થઈ રહ્યા હતા તેને પણ ગંભીર રીતે અડફેટે લીધા હતા.
પૂરપાટ ઝડપે દોડી રહેલી કારની ઝડપે આવેલા એક બાઈક ચાલક અને એક બાળકનું મોત નીપજ્યું હતું. જ્યારે આ અકસ્માતમાં ગંભીર રીતે ઈજાગ્રસ્ત થયેલાઓને વરાછા વિસ્તારમાં આવેલી પી.પી.માણીયા હોસ્પિટલખસેડવામાં આવ્યા છે. આ ઘટનાની જાણ થતા ઉતરણ પોલીસ દ્વારા આ કારચાલકની ધરપકડ કરી લેવામાં આવી છે. હાલ તો અકસ્માત મોતનો ગુનો નોંધીને વધુ તપાસ હાથ ધરવામાં આવી છે.
મૃતકના નામ
- વિયાન દવેશભાઈ વાઘાણી (ઉં.વ. 6)
- સંકેત હિંમતભાઈ વાવડિયા (ઉં.વ. 29)
કાર ચલાવતી વખતે ઝોકું આવતા અકસ્માત થયો
ઉત્રાણ પોલીસ સ્ટેશનના પીઆઈ એ.ડી. મહંતે જણાવ્યું હતું કે, જિજ્ઞેશ અમૃતલાલ ગોહિલ નામના વ્યક્તિ દ્વારા અકસ્માત થયો હોવાનું સામે આવ્યું છે. અમરોલીના સ્ટાર ગેલેક્સી છાપરાભાઠા રોડ વરિયાવ વિસ્તારમાં રહે છે. પ્રાથમિક પૂછપરછ દરમિયાન તેમણે જણાવ્યું છે કે, પોતાના અમદાવાદના સંબંધી જે કેન્સરથી પીડિત છે તેના અમદાવાદ સિવિલ હોસ્પિટલમાં ખબર અંતર પૂછીને પરત ફરી રહ્યો હતો. આ દરમિયાન તે સુરતના રિંગ રોડ વિસ્તારમાંથી પસાર થઈ રહ્યો હતો. આ દરમિયાન એકાએક ઝોકું આવી જતા સ્ટિયરિંગ પરથી કાબૂ ગુમાવ્યો હતો અને તેના કારણે અકસ્માત થયો હતો.
આરોપી સામે ગુનો દાખલ કરવામાં આવ્યો
પોલીસ દ્વારા હાલ તેમની ધરપકડ કરી લેવામાં આવી છે. આરોપી નશાની હાલતમાં હતો કે કેમ તેને લઈને બ્રિથ એનેલાઇઝરથી તપાસ કરવામાં આવી છે. તેમજ બ્લડ સેમ્પલ પણ લેવામાં આવ્યા છે. આરોપી અકસ્માત સમયે નશાની હાલતમાં ન હોવાનું જણાય આવ્યું છે. પોલીસ દ્વારા હજી પણ તમામ પાસાઓની તપાસ કરવામાં આવી રહી છે અને કાયદેસરની કાર્યવાહી પણ કરી લેવામાં આવી છે. આરોપીની સામે ગુનો પણ દાખલ કરી દેવામાં આવ્યો છે.
પરિવાર સાથે બેસવા આવ્યા હતા
મૃતકના સંબંધીએ કહ્યું કે, બહેન ગામડેથી આવી હતી. જેથી સંબંધીઓ અને અમે બધા ત્યાં બેસવા ગયા હતાં. અચાનક રાત્રિના સમયે 100થી વધુની સ્પીડમાં કાર ચાલક અમારા પર ધસી આવ્યો હતો. કંઈ સમજીએ તે અગાઉ જ કારના ટાયર અમારા પર ફરી વળ્યાં હતાં. હું બેભાન થઈ ગયો હતો. પગમાં, છાતી અને એક હાથમાં ઇજા થઈ છે. પરિવારમાં ભાણેજ અને જીજાજી એક્સપાયર થઈ ગયા છે.
- ગુગલ ન્યુઝમાં KalTak24 News ની અપડેટ મેળવવા ક્લિક કરો: KalTak24 News
- નીચે આપેલી લીંક પર ક્લિક કરીને જોડાઓ કલતક 24 ન્યૂઝ KalTak24 News સાથે.
- અમારું ફેસબુક પેજ લાઈક કરો અને ફોન પર અપડેટ્સ મેળવતા રહો.
- વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.
- યુટ્યુબ ચેનલ સબસ્ક્રાઈબ કરીને જોતા રહો વિડીયો ન્યુઝ: KalTak24 News YouTube
